ӨМІРДЕН КЕЙІНГІ ӨМІР

Әулиеге түнеу

Бұл қазақ дүниетанымында ең көп кездесетін культтің бірі. Арыстан бабқа түнеу әдебінен басталған осы аңыз көшпелі қазақ жұртының ән-жырына, фольклорына, тұрмыс-тіршілігіне өте қатты әсер еткен. Әулиенің шарапатынан мақсат-мұратына жету сюжеті барлық жыр-дастанда молынан кездеседі.

«Алпамыс батыр» жырында:

Қожалардан бата алып,

Жапан кезген атанып,

Жоғары қарап өрледі.

Самарқанда сансыз бап –

Отырарда Арыстан бап,

Сайрамда бар сансыз бап.

Бәріне бір-бір түнеді.

Әзіреті Қаратау

Әулиенің кені еді.

Өзен, сайын тастамай,

Бәріне бір-бір түнеді.

Әзіреті Ысқақ бап

Бабатада дер еді.

Ілгергі өткен қариядан

Айтылып қалған кеп еді.

Тарыққанда сарғайып,

Ойына бір сөз келеді.

Ол уақытта Бабата

Томпайып жатқан жер еді.

Атбесік салып басына,

Қабырын бұлар түзеді.

Қалған малын сарып қып,

Бұған да үш күн түнеді.

* * *

Түнейді үш күн Байбөрі

Хазіреті сұлтанға.

Түркістанда Түмен бап,

Сайрамда бар сансыз бап,

Отырарда отыз бап.

Бабтардың бабын сұрасаң,

Ең үлкені Арыстан бап.