Кітап жолдарына көз жүгіртіп отырған уақытта ойыңызға не келеді? Қандай жолдар жүрегіңізге жол таба алды? Сөздің сиқыры санаңызды жаулады ма? Осынау серияда сондай үзінділер беріледі.

Әлқисса...

«Қазіргілер білімсіз. Кітап оқымайды. Шешендік сөздерді, мақал-мәтелді білмейді» деп осы жұрт бекер шулап жүр. Ал маған ешкімнің ештеңе білмейтіні жақсы болды. Кез келген жерде аузым көпіріп, көсіле сөйлеймін. «Тәйт, қате айтып отырсың!» дейтін пенде жоқ.
Қанағат Әбілқайыр «Періштелер жоқ жерде»

— Оу, жарандар, босқа айтысқанды қойып, одан да мен сияқты білетін адамнан сөз тыңдаңдар. Мына біз қазақ деген аз халықпыз. Оның өсуіне кедергі соңғы кезде жаңа бір кесел тағы пайда болды.
Тақырып өзгергені Нұрғайшаға жағып кетті білем, дереу сөзді іліп ала қойды:
— Ол қандай кесел? Құпия емес шығар.
— Қыздар шетінен оқымысты болып кетті.
Бұл тақырып маған оңтайлы сияқты көрінді. Нұрғайша алдында ұпайымды өсіре түспек ниетпен:
— Оқығандары жаман ба? — дедім өзімше қуланып. — Нұрғайша сияқты білімдар, алғыр болып өседі. Жақсы әйелдің жақсы бала тәрбиелейтінін ескерсек…
— Айтқаныңның жаны бар. — Рысхан сөзімді бөліп жіберді. — Алайда қыздар оқуларын жиырма үш-жиырма бес жас аралығында аяқтайды. Ана боп бала табатын нағыз қуатты шақтары...
Өтен Ахмет «Адасқан ғасыр»

Кісінің кісіге ауған көңілі түзу де адал болса, одан артық не керек?
Өтен Ахмет «Адасқан ғасыр»

Тәубе десеңдерші осы күндеріңе. Тәубе! Баяғыдай қалаға кіргізбей қойса, қалаға кіре қалсаңдар, баққа маңайлатпай қуса қайтер едіңдер? Қызық-ей, осы қазақтар…
Қанағат Әбілқайыр «Періштелер жоқ жерде»

баспаға әзірлеп, жиған-терген

Бегімхан  Ибрагим (КЕРІМХАНҰЛЫ) >>

Ақсу қаласының Абай атындағы ЖОББ мектептің қазақ тілі мен әдебиеті мұғалімі

Павлодар облысы

Қазақстан Журналистер Одағының мүшесі