ҰЙҚЫҒА ҚАТЫСТЫ ЛАЙФХАКТАР

• Уақтылы, сапалы ұйқыны отбасылық құндылыққа айналдырыңыз. Отбасыңыздың әр мүшесінің ұйқысы қануына жағдай жасаңыз.
• Жатар алдында терезені ашып, ауасын жаңартыңыз.
• Бөлме жылуы 18-20 градус болғаны жөн. Бөлме қоңыр салқын болса, ұйқы сапасы да жақсарады.
• Ұйықтар алдында сізді мазалайтын, ойыңызды бөлетін, стреске түсіретін нәрселерді оқымаңыз. Смартфон қолданбаңыз, теледидар көрмеңіз.
• Кофе секілді сергектігіңізді арттырып, ұйқыңызды қашыратын сусын ішпеңіз.
• Жатарда ми тынықтыратын релакс мелодиялар тыңдаған жақсы.
• Көршінің немесе көшедегі айқай-шу ұйқыңызға бөгет жасаса, ақ шуды қосып қойыңыз. Көңіліңіз бөтен дауысқа алаңдамай, тез ұйықтауға көмектеседі.
• Егер ертерек жатқанда ұйқыңыз келмейтін болса, жатардан бірнеше сағат бұрын (4-6 сағат) бұрын( белсенді дене жаттығуын жасауды әдетке айналдырыңыз. Жатардан 1-2 сағат бұрын аэробика, йога секілді денеңізді босататын жеңіл жаттығулар жасауға болады. Жатарда жылы душқа түсіңіз.
• Ұйықтар алдында күндізгі жақсы істеріңізді, жетістіктеріңізді ойлаңыз. Мүмкіндігінше, Алла берген сол күнгі нығметтер мен жақсылықтарды еске түсіріп, күнделігіңізге әрқайсысын жеке-жеке жазыңыз және арнайы алғыс айтып, шүкір етіңіз. Бұл сізді керемет сезімге бөлейді әрі ғажайып шабыт береді.
• Ұйықтар алдында сізді ренжіткен, көңіліңізге қаяу салған адамдардың бәрін кешіріп, сана мен жүрегіңізді реніштен тазалап жатыңыз.
• Ұйқыңыз келмесе, мұрынмен баяу әрі терең тыныс алып, асықпай сыртқа шығарыңыз (ішіңізбен дем алыңыз). Осылай 5 минут тыныс алсаңыз, ұйқыңыз тезірек келеді.
• Егер бір шешімге келе алмай қиналсаңыз, ұйықтау арқылы тынығып алыңыз. Зерттеушілердің сөзіне сенсек, ұйқы кезінде миымыз қиын проблемаларды шешумен айналысады. Ұйықтап тұрған соң, бір шешімге келу оңай.